28 верасьня 2009 году – У Беларусі распачынаецца праект «Тэрытарыяльна–арыентаванае разьвіцьцё рэгіёнаў, пацярпелых у выніку аварыі на Чарнобыльскай АЭС» – яго прэзэнтацыя адбылася ў мінулую пятніцу, 25 верасьня, у Гомелі. Праект зьяўляецца кампанэнтам сумеснай ініцыятывы Праграмы разьвіцьця ААН і Эўрапейскай камісіі «Мінімізацыя нэгатыўных наступстваў катастрофы на Чарнобыльскай АЭС на тэрыторыі Рэспублікі Беларусь». Агенцтвам–выканаўцам ад Беларусі стала Міністэрства па надзвычайных сытуацыях.

Новы праект зь бюджэтам больш за 1,5 млн. эўра закліканы садзейнічаць актывізацыі мясцовых супольнасьцяў у рэгіёнох, пацярпелых ад Чарнобыльскай катастрофы, аказваць ім практычную дапамогу ў распрацоўцы і рэалізацыі праектных ініцыятываў, накіраваных на рашэньне пэўных сацыяльна–эканамічных праблемаў паселішчаў і ўсяго рэгіёну. Падчас рэалізацыі праекту, разьлічанага на 30 месяцаў, будуць абраныя прынамсі пяць канкрэтных супольнасьцяў (паселішчаў) у кожным з шасьці мэтавых раёнаў, якія будуць уключаныя ў праектныя мерапрыемствы. Цяпер у якасьці такіх раёнаў вызначаныя Веткаўскі, Буда–Кашалёўскі, Хойніцкі і Жыткавіцкі, а да канца рэалізацыі праекту будуць абраныя яшчэ два раёны з Гомельскай і Магілеўскай абласьцей.

– Чарнобыльская праблематыка вельмі шырокая, – сказала, зьвяртаючыся да ўдзельнікаў уступнага сэмінару, начальнік сэктара міжнародных праектаў упраўленьня міжнароднага супрацоўніцтва МНС Беларусі Сьвятлана Машчынская. – Таму ініцыятыва ЭЗ/ПРААН дазваляе ўносіць любыя варыянты праектных прапановаў, прыкладам, мерапрыемствы па папярэджаньні і інфармаваньні, працу зь дзецьмі і моладзьдзю. Мы ў сваю чаргу будзем навучаць правілам падрыхтоўкі праектных заявак.

Атрымальнікамі міжнароднай тэхнічнай дапамогі ў рамках праекту стануць Гомельскі аблвыканкам, выканаўчыя камітэты мэтавых раёнаў, Рэспубліканскае навукова–дасьледніцкае ўнітарнае прадпрыемства «Інстытут радыялёгіі», КЖУП «Веткаўскае», а таксама Дэпартамэнт па ліквідацыі наступстваў катастрофы на Чарнобыльскай АЭС МНС Беларусі.

– 30 % праектаў міжнароднай тэхнічнай дапамогі, якія рэалізуюцца сёньня на тэрыторыі Беларусі, ахопліваюць Гомельскую вобласьць, – заявіў начальнік аддзелу каардынацыі тэхнічнай дапамогі і супрацоўніцтва зь міжнароднымі арганізацыямі Міністэрства эканомікі Ян Бельчык. – Новы праект таксама патрэбны і значны – як для чарнобыльскіх рэгіёнаў, так і для дзяржавы наагул.

У выніку ажыцьцяўленьні праекта ў мэтавых раёнох будзе ўкарэнены падыход, які прадугледжвае іх тэрытарыяльна–арыентаванае разьвіцьцё (ТАР). Павялічыцца колькасьць сацыяльных і эканамічных ініцыятываў, распачатых на ўзроўні мясцовых супольнасьцяў і накіраваных на паляпшэньне ўмоваў жыцьця. У прыватнасьці, у кожным з мэтавых раёнаў сумеснымі намаганьнями зацікаўленых бакоў (прадстаўнікоў малога і сярэдняга бізнэсу, донараў, мясцовых уладаў ды інш.) мяркуецца рэалізаваць прынамсі адзін праект, накіраваны на стварэньне новых працоўных месцаў і падвышэньне прыбыткаў для сацыяльна–ўразьлівых групаў насельніцтва. У далейшым досьвед ТАР будзе распаўсюджаны на іншыя раёны Беларусі, пацярпелыя ад Чарнобыля.

Па дадатковую інфармацыю, калі ласка, зьвяртайцеся да кіраўніка праекту Андрэя Пінігіна, тэл. (+375 17) 256–14–57.

Для друку